Tinubu tewo gba Osoba pada sinu egbe APC

*Ikunsinu laaarin Osoba ati Amosun si wa sibe bi oke olumo

*“Talo so wi pe  ija wa laaarin emi ati Amosun?” - Tinubu

*Akitiyan gomina 2019 ti n lo labenu nipinle Ogun

Osoba ati Tinubu

 Oloye Olusegun Osoba, ti fi egbe oselu SDP sile pada sinu egbe APC eleyii to ti wa tele. Ikede Igbese tuntun yii lo waye leyin ipade ti Osoba se pelu awon oloye egbe APC lojo Sande to koja yii [03-04-16] ninu ile re to wa n’Ikoyi nipinle Eko. 

Lara awon to peju sibi ipade naa ni Oloye Bola Tinubu, Oloye Bisi Akande, Ogbeni Rauf Aregbesola ati Gomina Abiola Ajimobi. Awon yoku ti won wa nibi ipade naa ni igbakeji Gomina ipinle Eko, Arabirin Oluranti Adebule, eni ti n soju Gomina Ambode, Gomina ipinle Ekiti nigba kan ri, Otunba Niyi Adebayo, Oloye Pius Akinyelure, Senato Gbenga Obadara ati Omooba Segun Adesegun.

Sugbon sa, Gomina Ibikunle Amosun lati ipinle Ogun ko fojuhan nibi ipade naa. Enikeni ko ri igbakeji re, Arabirin Yetunde Onanuga. Bakan naa awon oloye egbe APC lati ipinle Ogun ko si nibi eto naa rara.

Leyin ipade to waye naa, Gomina ipinle Osun, Ogbeni Rauf Aregbesola baba Kabiru ba awon oniroyin soro nipa ibi ti ipade ti won se fun odinindi wakati meta naa yori si.

“Inu mi dun lati kede re fun yin wi pe, Akinrogun Aremo ti pada sinu egbe itesiwaju. Gbogbo ede-aiyede to suyo pata lo si ti di afiseyin teegun un fiso,” Ogbeni Aregbe se alaye re bee.

Bakan naa ni Oloye Bola Tinubu ko sai fi idunnu re han nigba ti n ba awon oniroyin soro nipa bi Olusegun Osoba se pada wale. Eleyii to se apejuwe re gege bi igbese rere fun egbe itesiwaju. Nibe naa ni awon oniroyin ti n beere nipa aifarahan gomina Ibikunle Amosun, ko ma lo je wi pe inu gomina ko dun si igbese to waye naa. Ohun ti oko Oluremi so ni yii:

“Kosi enikeni ti a yo sile seyin rara. Okan soso ni gbogbo wa, ati gomina ipinle Ogun. Abi enikan so fun yin wi pe a n ja bi? Ninu ero yin lasan niyen wa. Okan soso nigbogbo wa. Igbiyanju ti wa si ni lati mu Naijiria tesiwaju. Bakan naa si ni akitiyan wa da lori ki ile Naijiria le jajabo lowo imunisin odun merindinlogun ti PDP ti fi bale je,” Tinubu se alaye naa bee.

Fun awon to ba kiyesi bi oselu ipinle Ogun se n lo, leyin akoko die ti Senato Ibikun Amosun wole ni aarin oun ati Osoba ko ti gun mo. Lara esun ti Osoba si fi kan Amosun ko ju wi pe, awon mudunmudun to ye ko maa bo si owo awon omo egbe APC ti won jise-jiya fegbe ni Amosun fi n dun won. Eleyii to je wi pe, awon to tele Amosun wa lati inu egbe ANPP ni won jo n se apapin. Rugudu naa de gongo to fi di wi pe, Oloye Osoba fi egbe APC sile pelu awon emewa re bo sinu egbe SDP.

Bakan naa, Senato Adeola Olamilekan ti gbogbo eniyan mo si Yayi ti n soju ekun Iwo-oorun Eko nile igbimo asofin agba l’Abuja fe gbiyanju lati rekoja lo si ipinle Ogun to je ipinle re lati dije fun senato. Sugbon ohun ti a gbo ni wi pe, Amosun ro Tinubu lati parowa fun Yayi lati jawo ni ona lati le fi anfaani sile fun eni ti Amosun fe ko dije. Tinubu gbo si Amosun lenu, eleyii lo fi mu Yayi lo pada tun apoti idibo senato re gbe nipinle Eko. Gege bi oro awon agba, won ni ti awo ba ki fun ni, a a ki fawo pada ni. Bu-fun-mi-n-bu-fun-o si ni opolo n ke lodo. 

Senato Yayi yii lo tun pete lati dije fun ipo gomina Ogun lodun 2019 pelu atileyin Tinubu bayii. Aba yii tun ni Amosun tun un gbiyanju lati tako latari eni tie kan to ni nipamo to fe gbe ipo gomina fun lodun 2019. Awon nnkan wonyii si ti bere si fa ikunsinu laaarin Tinubu ati Amosun eleyii ti ko ti han sita gedegbe.

 

Gege bi alaye awon onwoye lagbo oselu, won ni oseese ki Tinubu fe lo Osoba lati yi Amosun lagbo dasina ninu eto idibo gomina ipinle Ogun lodun 2019.  Sebi awon kan lo wi pe, ota ota mi, ore mi ni i se. O seese ko je idi ti Tinubu fi fa Osoba mora ni yii. Eleyii to si mu Amosun takete bi abata ti n se bi eni wi pe ko bodo tan.

Share on Google Plus

About Olayemi Oniroyin